Reyna Elenang Pugot

NAKANGANGA SIYA SA harap ng TV. Miyerkules ngayon. May featured film ni Sharon Cuneta sa ABC 5.

You're nothing but a second rate, trying hard, copycat!

Ginagaya niya ang buka ng bibig ni Cherie Gil sa 'Bituing Walang Ningning'. Para siyang goldfish na inaatake ng asphyxiation.

"Hoy, Bebang! Ano ba't nakatunganga ka na naman d'yan sa harap ng TV. Nakatambak ang mga huhugasan mo sa lababo. Hindi 'yan maglalakad papunta sa 'yo, aba!"

"Opo, inang," sabay hitsa ng hawak niyang walis-tambo.

Padabog siyang tumungo sa lababo.

NAGMIMITING SA KAPILYA ang mga kababaihan ng Confradia de Nuestra Señora Maria Dolores y Matabungcal. Sa mga pagkakataong ito nagagamit ni Bebang ang kanyang supersonic bionic ear.

Nagsu-shortlist ang mga manang kung sinu-sino ang mga kukunin para sa gaganaping santakrusan.

Shempre automatic na Reyna Elena ang anak ni Misis Cheng. Para saan ba't siya ang hermana mayor ngayong taon at todo-todo ang press release niyang libu-libo na ang nasunog niyang pera para sa damit ng mga santo.

Sa Maynila pa nag-aaral ang anak ni Misis Cheng, si Lucy. Makinis ang mala-porselanang balat. Alaga sa imported na coco buttermilk lotion. Malulusog ang mga tanim niyang pakwan sa dibdib. Ang pula ng kanyang mga labi. Pwedeng maging commercial model ng Revlon non-stick lipistik.
Luluwas daw siya sa unang linggo ng Mayo. Nasasabik ang mga manang at para na raw silang makakakita ng artista.

BATA PA LANG si Bebang ay pinangarap na niyang maging Reyna Elena. E ano kung popondohan ni Misis Cheng ang buong santakrusan. E ano kung mukhang bomba star si Lucy Cheng.

Matagal na niyang hinihintay ang pagkakataong ito. Nakikipagtulakan pa siya sa mga deboto ng Nazareno sa Pista ng Quiapo para matupad lang ang kanyang natatanging hiling.

Dito naman buo ang suporta ng kanyang ina. Alaga siya sa mga beauty contest simula pagkabata. Munting Mutya ng Kuribang. Little Miss Ramelon. Kahit buhul-buhol ang boses niya pilit din siyang isinasali ng nanay niya sa mga amateur.

Naaalala pa niya ang laging sinasabi ng nanay niya sa mga kumadre nitong tsismosa. Magiging artista siya paglaki. Siya ang mag-aakyat ng pera sa bahay. May balat kse siya sa pigi, sa tapat ng bulsa. Magiging bomba star siya.. katulad ni Lucy Cheng. Che!

Bakit pa kasi simula pagkabata ay karibal na niya sa mga paligsahan ang anak ni Misis Cheng. Kaya hindi siya manalu-nalo kapag sponsorship na ang laban. Che!

Habang nagbabasa siya ng Kislap magazine ay biglang dumating ang kanyang ina.

"Hoy, Bebang, nakapagsaing ka na ba?"

"Opo, inay. Dala n'yo na ba?" Sinisilip niya ang laman ng supot sa kamay ng kanyang ina.

"Heto. Ang daming may kursunada diyan sa ukay-ukay. Nakipag-away pa ako. Napunit tuloy ang gilid. Bayaan mo, tatahiin ko na lang. Hindi naman halata. Tapalan na lang natin ng sequins at ruffles galing sa kurtina."

"Inang naman.." yamot niya.

"E kung dagukan kaya kita d'yan," sabay-bato sa kanya ng dala nito. Sakto namang sa mukha niya lumanding ang supot. "Puntahan mo yung sinasaing mo't baka masunog na naman. Kung ayaw mong pakainin na naman kita ng tutong."

Mistulang bagong banat ang mukha niya sa pagkakangisi nang tumayo para pumunta sa kusina. Spread-eagle sa kanyang mga kamay ang lumang gown na binili ng nanay niya sa ukay-ukay. Konting laba lang 'yan ng paborito niyang bareta para na 'yang galing UK.

IMBITADO ANG BUONG confradia sa welcome home party ng anak ni Misis Cheng.

"Ayan na siya! Ayan na siyaaa!" sigawan nila. Para namang si Sharon Cuneta ang dumating. Bumaba siya sa magarang sasakyan.

"Ay, ang ganda naman ni Lucy!!"

"Ang ganda naman ng suot niyang kuwintas. Ang laki ng bato!"

Swarovski raw yun, sabi ni Lucy.

"Ano kamo? Sharobski?"

Ang mga hikaw naman niya may mga kumikislap na diyamante.

Ngitngit na ngitngit si Bebang at halos madurog niya ng hawak na tinidor ang leche flan sa kanyang plato. Naisip niyang isalaksak sa lalamunan ni Lucy ang tinidor na hawak niya.
Che!

Nakita niya kung papaano maglaway ang mga kalalakihan sa malulusog na mga papaya ni Lucy. Kinapa niya ang sarili niyang mga dibdib. Lumubog yata ang dalawang tansan sa dibdib niya.
"HINDI! HINDI PUWEDE!! Ako ang magiging reyna elena!!"

Nanlilisik ang mga mata niya sa liwanag ng mga itim na kandilang binili niya sa Quiapo. Ikinandado niya ang sarili sa kuwarto at pinatay niya ang mga ilaw.

"Hindi puwede!! Nyaaaaaaaaaaaaaaaaaaaahhhh!!"

At dala ang kanyang voodoo doll, lumabas siya sa kuwarto at dumiretso sa bahay ni Lucy Cheng.

NAGTAGO SIYA SA likod ng tukador. Hindi napansin ni Lucy ang pagpasok niya sa kuwarto. Kagagaling lang nito sa banyo at nakabalot pa ng tuwalya ang kanyang ulo.

Habang nagpapahid si Lucy ng imported na coco buttermilk lotion sa kanyang mga hita, biglang bumulaga si Bebang sa likod niya.

"Ay, kabayo!"

Napatalon si Lucy sa ibabaw ng kama na parang dinapuan ng ipis sa batok.

"Sino ka?"

Hawak ni Bebang ang tinidor na kinupit niya noong handaan. Nanlilisik ang kanyang mga mata at ngayon ay kahawig na niya si Lavinia sa 'Bituing Walang Ningning'.

"Ako si Bebang. Beverly Vergel. Hindi ako yung artista. Mas bata ako sa kanya. Halata ba?"

"Weno ngayon?"

Nang mahimasmasan si Lucy ay namukhaan niya ang kaharap. "Bebsi? Ikaw si Bebsi?"

"Beverly para sa 'yo, ineng."

"Ano'ng kailangan mo sa 'kin?"

"Iisa lang ang may karapatang maging Reyna Elena ngayong taon. At iyon ay ako! Muwahahahaha!" Sinigurado niyang magagaya niya ang tawa ni Luz Valdez for added effect. Para masindak lalo si Lucy.

"Pero.. Bakit? Paano?"

"Duh! Di mo pa gets."

"Hinde e. Teka, bigyan mo 'ko ng chance."

"Isa lang sa atin ang dapat matira. At dahil kailangang ako ang mabuhay. Kailangang patayin kita! Muwahahahahahahahaa!!" Hindi niya sinadya pero kumislap ang ilaw sa kuwarto. For added effect.

"Kailangan kitang patayin!! Kailangaaaaaann!!!"

Hindi napansin ni Bebang ang nahulog na mga unan sa lapag nang tumalon sa kama si Lucy. Naapakan niya ang unan at siya ay nadulas.

Humagis ang tinidor sa ilalim ng kama.

Nakakita ng pagkakataon si Lucy at sinugod niya si Bebang. Pero bago pa man siya makalapit ay nakadampot na si Bebang ng mga gamit na nakapatong sa tukador. Initsa niya ang mga ito kay Lucy na parang mga shuriken.

Umilag si Lucy sa paparating na mga lumilipad na gamit niya. Lumiyad siyang parang si Trinity sa Matrix. Pinanuod niya iyon ng limang beses.

Dumayb sa kanya si Lucy at nadulas uli siya dahil sa natapong imported na coco buttermilk lotion sa sahig. Nagpagulong-gulong sila sa sahig. Sinasabunutan ni Lucy ang buhok niya. Hindi siya makakapayag. Siya ang bidang kontrabida sa kuwentong ito.

Tinadyakan niya sa bayag si Lucy pero dahil walang bayag si Lucy ay kinurot na lang niya ito sa singit. Umaray si Lucy. Nakakita siya ng pagkataon. Tinangka niyang sakalin si Lucy pero nakabuwelo ito at nakuhang makatayo.

Inabot niya ang mahabang buhok ng papalayong si Lucy. Masyadong madulas at malambot ang buhok ni Lucy kaya nakaligtas ito sa kanyang kamay. Next time, sabi niya sa sarili, gagamit na rin siya ng conditioner.

Nadampot niya ang pink na pang-ahit ni Lucy. Sinugod niya si Lucy at dinakma niya ito sa leeg. Nadulas din si Lucy sa nagkalat na mga unan.

Itinaas niya ang pink na pang-ahit sabay sabing, "Katapusan mo naaa!!"

Gamit ang pang-ahit ay unti-unti niyang nilaslas ang leeg ni Lucy. Nahirapan siya dahil medyo mapurol na ito. Pero pagkatapos ng ilang minuto ay narating ng bleyd ang karotid at jugular ni Lucy. At namatay itong fresh at bagong ligo. Natupad rin ang kanyang death wish kahit paano.

DAHIL SOUND-PROOF ANG kuwarto ni Lucy ay kinabukasan na natagpuan ang kanyang malamig na bangkay. Natulala si Misis Cheng nang buksan niya ang pinto. Nalunok niya ang buto ng santol na nilalapa niya. Nabasag ang garapon ng bagoong na kanyang nabitawan.
Si Bebang ang hinirang na Reyna Elena. Bidang-bida sa buong barangay ang suot niyang gown na akala nila ay galing UK. Sa wakas, nagamit na rin niya ang liquid foundation na matagal niyang pinag-ipunan.

Habang nakasabit siya sa braso ng kanyang konsorte na kahawig ni Isko Moreno ay bigla siyang napatingin sa isang madilim na eskinita.

Ano ito? May naaaninag siyang babaeng nakaputi. Pinikit-pikit niya ang kanyang mga mata ng tatlong beses at nakilala niya ang katawan ng isang babaeng naka-gown. Namukhaan niya ang pugot na ulong hawak nito. Nakatitig sa kanya ang nanlilisik na mga mata ni Lucy Cheng!

Sa pagkagulat ay kumalas siya sa pagkakakapit sa kanyang konsorte na nadukdukan ng lusis sa mukha. Napatid niya ang batang Constantino at nasubsob ang mukha nito sa lupa. Tumakbo siya. Tumakbo siya nang tumakbo. Hindi ito maaari. Hindi ito maaaring mangyari. Patay na si Lucy Cheng! Pinatay na niya si Lucy Cheng!!

Tumakbo siya. Tumakbo siya sa pinakamatulin na kaya niyang takbuhin. Nagpa-pump ang adrenalin niya at sa wakas ay nag-eexpand ang dibdib niya. Tumakbo siya nang tumakbo at dinaig niya si Lydia de Vega. Hanggang sa mahulog siya sa isang bukas na manhole at nilamon siyang buo ng imburnal.