Bakat

Linggo ng gabi nang umuwi ang utol ko galing sa swimming ng tropa niya sa Laguna. Ugali na niyang maghubad ng t-shirt sa harap namin kaya napansin agad siya ni nanay.

Papunta siya sa CR nang makasalubong siya ni nanay. Napansin ni nanay ang kakaibang marka sa dibdib niya.

Nangitim ang utol ko dahil sa swimming pero alsadung-alsado yung marka sa dibdib niya. Kung hindi ako nagkakamali, sabi ni nanay, marka iyon ng mga kamay.

Dalawang maliliit na kamay na parang kamay ng bata ang hugis ng marka sa dibdib ng utol ko. Iyong parteng ‘yun ang hindi na-sunburn. Parang may isang bata na naglapat ng magkabilang kamay sa dibdib niya.

Nag-alala agad ang nanay ko. Baka nakulam ang utol ko o nabati nang mag-swimming sila sa Laguna. Nagsimula na siyang magtanong kung saan sila nagpunta.

Sa public swimming pool sila nag-outing pero may mga puno raw silang dinaanan, sabi ng utol ko. Medyo malayo ang swimming pool sa may gate. Dumaan sila sa gilid ng isang maliit na bundok. Maraming puno. Doon din sila nagkuhaan ng picture, kuwento pa niya.

Wala naman daw siyang nararamdaman. Hindi naman siya nilalagnat. Baka napagkatuwaan lang siya ng isa sa mga tropa niya. Baka nagkataon lang na hugis kamay iyong marka sa dibdib niya.

Kinabukasan hindi nakapasok ang utol ko. Hindi makatayo sa kama. Nangangatog sa ginaw. Namimilipit ang tiyan. Nananakit ang buong katawan. Trinangkaso.

Siguro. Baka trinangkaso. Pero nang tingnan ni nanay ‘yung marka sa dibdib niya, parang naging prominente ito. Naging malinaw na hugis kamay ng bata kumpara nang tingnan namin noong gabi. Lalong lumakas ang kutob ng nanay ko na baka nabati nga ng mga engkanto ang utol ko.

Lumipas ang isang linggo ay hindi pa rin bumababa ang lagnat ng utol ko. kaya ipinatawag ni nanay ‘yung kapitbahay naming nagtatawas. Sabi niya, isang elemental spirit ang nagbiro sa utol ko noong magswimming sila. Baka nagambala nila ang bahay ng elemental nang mag-swimming sila kaya siya napagkatuwaan. Nagbigay siya ng instruction na susundin namin para gamutin ang utol ko. Ikukulong daw niya ang espiritu ng elemental sa loob ng mga patak ng kandila na kailangan naming sunugin kasama ng damit na sinuot ng utol ko.

Unti-unti namang gumaling ang utol ko. Sinunod namin ang sinabi ng nagtatawas. Pero sinabayan din namin ng gamot. Dinala namin sa doktor ang utol ko. Para makasigurado na rin. Mabuti na ‘yung may bisa ng medisina na tutulong sa pagpapagaling sa utol ko. Hindi lang ‘yung nakikipagsugal kami sa galing ng nagtatawas.

Pero akala namin ay tapos na.

Nag-iba ng ugali ang utol ko. Kung dati-rati ay masigla at palabiro ang utol ko, ngayon lagi na siyang tahimik. Pag umuuwi siya ng bahay ay dumidiretso agad sa kuwarto niya. Maaabutan na lang namin na nakasubsob sa libro ang mukha o nakikinig ng mp3. Nawalan din siya ng ganang kumain.

Nag-alala ang nanay ko. Sabi niya, baka bumalik ang elemental na nagbiro sa kanya noon sa swimming nila ng tropa niya.

Inilapit ulit siya sa nagtatawas at hindi nga kami nagkamali. Bumalik nga ang elemental. Sinunod namin ang mga bilin ng nagtatawas pero, sa pagkakataong ito, hindi nagbalik ang sigla ng utol ko.

Isang gabi, inaya kong makipag-inuman ang utol ko. Kinatok ko siya sa kuwarto. Naabutan ko siyang nakahiga at hindi maalis ang titig sa kisame. Lumingon lang siya saglit sa akin pero hindi siya sumagot. Kinatok ko siya ulit. Pumasok na ako sa kuwarto para hindi na siya makatanggi. Naobliga namang lumabas ang utol ko para samahan akong uminom.

Nag-usap kami tungkol sa pamilya. Sa planong pagreretiro ng tatay ko na construction worker sa Iraq. Sa plano ni tatay na pagtatayo ng maliit na tindahan sa tapat ng bahay namin para naman malibang si nanay. Napag-usapan namin ng utol ko ang mga kalokohan namin noong mga bata pa kami. Noong pumuslit kami isang hapon para maglaro sa quarry. Noong umuwing duguan ang tuhod ng utol ko dahil nadulas siya sa bundok ng mga bato. Itinago namin kay nanay ang aksidenteng iyon pero natuklasan din niya. Nanay kasi siya, sabi ni utoy. Malakas ang kutob.

Noon ako nakasilip ako ng puwang para pag-usapan namin ang buhay ng utol ko. Ang plano niya pagkatapos niyang mag-graduate. Gagayahin din ba niya si tatay na nagtrabaho sa ibang bansa?

Hanggang sa mapag-usapan namin ang lovelife ng utol ko. Kuwento niya, bago pala sila mag-swimming noon ay nag-break sila ng girlfriend niya. Inisip ko kung sino iyon. Naalala ko iyong maliit na babaeng dinala niya isang tanghali sa bahay para sila mag-lunch. Pagkatapos ay umalis din dahil gagawa raw sila ng project.

Biglang napahagulgol ang utol ko. Ewan kung sa sobrang kalasingan. Pero matapat siya sa sarili. Matapat niyang sinabi sa akin ang sakit na nararamdaman niya hanggang ngayon, sa pagbe-break-up nila noong babae. Hanggang ngayon minumulto siya ng alaala ng ex niya.

Naisip ko tuloy ngayon na hindi binati ng engkanto ang utol ko. Ang mga marka ng mga kamay sa dibdib niya ay isang manipestasyon ng kapit sa kanya ng ex niya. Sa sobrang pag-iisip niya, lumabas ito at nagpakita ng sarili. Mula noon, naintindihan ko na ang utol ko. Tinulungan namin siya ni nanay na makaraos sa maliit at di seryosong problema niya sa relasyon pero sineryoso namin dahil siya ay bahagi ng pamilya.